Hvernig breytist helgidagafrí með betri vinnutíma vaktavinnumanna?

• Ef þú ert að safna vetrarfríi í dag, heldur þú því áfram þangað til kerfisbreytingin tekur gildi þann 1.maí 2021.
• Það vetrarfrí sem þú átt inni þegar kerfisbreytingin tekur gildi helst inni í kerfinu og gilda um það sömu reglur. Ef uppsafnað vetrarfrí hefur ekki verið tekið út árið 2022 er það greitt út líkt og áður.

Með kerfisbreytingunni betri vinnutími vaktavinnumanna styttist vinnuvika vaktavinnufólks frá 40 klst. á viku í 36 klst. á viku miðað við fullt starf. Einnig er möguleiki á frekari styttingu með vægi vinnustunda eða niður í allt að 32 klst. á viku. Auk þess eru vinnuskil vaktavinnumanna jöfnuð á við dagvinnumenn.

Í hverju felst breytingin?

Frá 1. maí 2021, mun verða breyting á helgidagafríi. Árleg vinnuskylda hjúkrunarfræðinga í vaktavinnu á reglubundnum vöktum verður að jafnaði sú sama og hjá hjúkrunarfræðingum í dagvinnu. Vinnuskylda vaktavinnufólks lækkar því um 7,2 vinnuskyldustundir miðað við fullt starf vegna hvers sérstaks frídags og stórhátíðardags, skv. gr. 2.1.4.2, sem falla á mánudag til föstudags.
Það þýðir að þegar að rauðir dagar bera upp á virka daga þá styttast jafnframt vinnuskil hjúkrunarfræðinga í vaktavinnu þann mánuðinn miðað við fjölda frídaga. Skýringarmynd má sjá hér.

 

Hvert er markmið breytinganna?

Markmið með jöfnun vinnuskila er að gera hjúkrunarfræðingum í vaktavinnu kleift að taka út frí jafnóðum vegna styttri vinnuskila þegar rauðir dagar falla á virkan dag. Kostir þess eru að þeir ná hvíld og endurheimt með reglubundnum hætti í stað þess að geta tekið út frí ári eftir að hafa áunnið sér slíkt.

Er hægt að safna upp frídögum vegna vinnu á sérstökum frídögum?

Hjúkrunarfræðingar geta áfram óskað eftir því að safna upp tímum í vinnuskil vegna sérstakra frídaga og stórhátíðardaga. Óski hjúkrunarfræðingur eftir því skal hann tilkynna sínum yfirmanni um það fyrir framlagningu vaktskrár þegar ávinnsla á sér stað. Yfirmanni er skylt að verða við óskum starfsmanns enda verði því viðkomið vegna starfsemi stofnunar.

Dæmi:
Hjúkrunarfræðingur óskar eftir því að safna upp vinnuskilum vegna frídaga í apríl til úttektar vegna fyrirhugaðrar afmælisferðar í september. Hægt er að verða við því starfseminnar vegna og safnar hjúkrunarfræðingur upp vinnuskilum sem nemur 4*7,2 klst. = 28,8 klst. Um er að ræða frídaga sem falla á skírdag, föstudaginn langa, annan í páskum og uppstigningardag. Vinnuskil hans í apríl verða þá 36 klst. á viku, án þess að tekið sé tillit til vægi vinnuskyldustunda, eða sú sama og ef ekki væru rauðir dagar sem bæru upp á virka daga. Hjúkrunarfræðingur er þá + 28,8 klst. í vinnuskilum eftir apríl mánuð sem hann mun jafna út í september.