157 þúsund flettingar á viku á heilsuvera.is

Heilsuvera.is er sá vefur sem flestir ef ekki allir Íslendingar þekkja og ekki síður netspjallið á síðunni sem hefur slegið öll met í fjölda heimsókna í kjölfar covid-19. Margrét Héðinsdóttir hjúkrunarfræðingur stýrir Heilsuveru af miklum myndarskap og hefur byggt upp netspjallið sem gegnir mjög mikilvægu hlutverki í dag. Vefurinn er rekinn af Heilsugæslu höfuðborgarsvæðisins og Embætti landlæknis. Margrét sagði okkur frá vefnum og hvernig hann hefur þróast í gegnum árin, og ekki síst hversu miklu máli hann skiptir fyrir fólk í dag.

„Já, Heilsuvera er vefur fyrir almenning um heilsu og áhrifaþætti hennar. Inni á mínum síðum er öruggt vefsvæði þar sem hægt er að eiga í samskiptum við starfsfólk heilbrigðisþjónustunnar og nálgast gögn úr eigin sjúkraskrá. Markmið síðunnar er að koma á framfæri við almenning áreiðanlegri þekkingu um þroska, heilsu og áhrifaþætti heilbrigðis. Við viljum vera til staðar fyrir fólk með réttar og öruggar upplýsingar,“ segir Margrét og tekur um leið fram að vefurinn sé fjórskiptur. „Já, með því á ég við að það eru mínar síður þar sem þarf að nota rafræn skilríki, í öðru lagi er það þekkingarvefurinn þar sem fólk getur lesið sér til um fjölmargt sem við kemur heilsu, í þriðja lagi er þjónustuvefsjá þar sem fólk getur fundið næstu heilsugæslu eða bráðaþjónustu og fjórði þátturinn er svo netspjallið sem er opið frá 8 til 22 alla daga.“

„Já, það er varla hægt að segja að netspjallið hafi verið til áður en covid bauð sér í heimsókn. Við opnuðum netspjallið rétt fyrir jólin 2018 en þá svaraði ég ein og var bara með opið þegar ég gat. Meðalfjöldi samtala árið 2018 var 12 samtöl á dag. Svo kom covid og á 2 vikum fór spjallið úr þessum 12 í 1070 á dag.“

Netspjallið varla til fyrir covid

Hjúkrunarfræðingar svara og leiðbeina fólki um heilbrigðiskerfið og gefa almenn ráð á netspjallinu. Margrét segir að vefurinn, og ekki síst netspjallið, hafi sprungið út eftir að covid-19 bankaði upp á. „Já, það er varla hægt að segja að netspjallið hafi verið til áður en covid bauð sér í heimsókn. Við opnuðum netspjallið rétt fyrir jólin 2018 en þá svaraði ég ein og var bara með opið þegar ég gat. Meðalfjöldi samtala árið 2018 var 12 samtöl á dag. Svo kom covid og á 2 vikum fór spjallið úr þessum 12 í 1070 á dag. Það segir sig sjálft að ég átti ekki séns í þetta. Ég fór til framkvæmdastjóra hjúkrunar á Heilsugæslu höfuðborgarsvæðisins (HH) einn daginn og spurði: „Eigum að loka þessu netspjalli eða reyna að manna það?“ Það var tekin ákvörðun á núll einni að manna það til að anna eftirspurn og fengu allir hjúkrunarfræðingar og ljósmæður sem vinna á skrifstofu HH og á Þróunarmiðstöð íslenskrar heilsugæslu skyndikúrs og var svo hent í djúpu laugina, segir Margrét.

15 hjúkrunarfræðingar vinna við að svara netspjallinu

Margrét segir að í dag séu 15 hjúkrunarfræðingar í vinnu við að svara netspjallinu en í þeirri bylgju sem nú er í gangi er aftur búið að virkja þá hjúkrunarfræðinga og ljósmæður sem vinna á skrifstofunni og það eru núna 25 manns að svara spjallinu. „Það er erfitt að standa þessa vakt í marga klukkutíma og því höfum við þriggja tíma vaktir og stundum bara tveggja tíma vaktir,“ segir Margrét, en netspjallið er opið frá kl. 8 til 22 alla daga.

„En ég hef fengið fyrirspurnir um eldamennsku á fiski, viðbrögð við slysum og óhöppum, frá fólki sem líður illa, finnur til, hefur orðið fyrir ofbeldi, er með óvær börn og þeim sem vilja vanda sig í uppeldinu, konum sem voru að átta sig á að þær eru barnshafandi og bara flest það sem við kemur heilsu og lífi fólks.“
Spurningarnar sem koma í gegnum netspjallið eru margar og fjölbreyttar, það þekkir Margrét manna best. „Fólk spyr um allt á milli himins og jarðar. Flestir eru að spyrja um covid-19 og vilja fá útskýringar á sóttkví og einangrun. Það er algengt að við vísum á heilsugæsluna en algengast er að almenn ráð dugi við þeim fyrirspurnum sem við fáum. En ég hef fengið fyrirspurnir um eldamennsku á fiski, viðbrögð við slysum og óhöppum, frá fólki sem líður illa, finnur til, hefur orðið fyrir ofbeldi, er með óvær börn og þeim sem vilja vanda sig í uppeldinu, konum sem voru að átta sig á að þær eru barnshafandi og bara flest það sem við kemur heilsu og lífi fólks,“ segir Margrét að lokum.

Viðtal: Magnús Hlynur Hreiðarsson.