Yfir 80 heilbrigðisstarfsmenn, þar af að minnsta kosti 14 hjúkrunarfræðingar, hafa látist í ebólufaraldrinum sem nú stendur yfir í Vestur-Afríku. Samkvæmt nýjustu tölum hafa samtals 1975 manns smitast og 1069 látist.
Faraldurinn er sá versti síðan veiran fannst fyrst 1976.
Hann byrjaði í Gíneu í desember sl. en hefur nú breiðst til Líberíu, Sierra
Leone og Nígeríu.
Magna Björk Ólafsdóttir hjúkrunarfræðingur og Elín
Jónasdóttir sálfræðingur fóru nýlega til Síerra Leone á vegum Alþjóðaráðs Rauða
krossins. Aðalverkefni þeirra er að fræða almenning um smitleiðir ebólu og
leiðir til að koma í veg fyrir smit. Vanþekking og vantraust á
heilbrigðisstarfsmönnum er stór ástæða þess að veiran hefur breiðst út eins og
raun ber vitni. Gunnhildur Árnadóttir hjúkrunarfræðingur er nýkomin heim frá Síerra Leóne þar sem hún gegndi yfirmannsstöðu á meðhöndlunarmiðstöð á vegum Lækna án landamæra.
Alþjóðasamfélagið er nú farið að átta sig á alvarleika málsins og lýsti Alþjóðaheilbrigðismálastofnunin 8. ágúst sl. yfir alþjóðlegu neyðarástandi. Í því felst að öll aðildarríki þurfa að bregðast við með ákveðnum hætti. Embætti landlæknis hefur birt frétt um ebólu og einnig gefið út leiðbeiningar til ferðamanna.