Nýtt tölublað Tímarits hjúkrunarfræðinga er nú komið á vefinn og í Google Play. Það er fyrsta tölublaðið sem kemur eingöngu út rafrænt. Meðal efnis má nefna greinar um blóðsýkingar af völdum miðbláæðaleggja og um endurhæfingu lungnasjúklinga. Einnig eru tvær greinar um hjúkrunarnám. Tvö viðtöl eru í tölublaðinu. Fyrra viðtalið er við Grétu Berg sem sinnir meðal annars listmeðferð í Hveragerði og hið síðara við Jos de Blok sem rekur fyrirtæki sem sinnir heimahjúkrun í Hollandi. Að auki er grein um nýtt nám í heilsugæsluhjúkrun með stuttu viðtali við Sigríði Síu Jónsdóttur. Þá er sagt frá nýafstaðnum aðalfundi og alþjóðadegi hjúkrunar.
Þeir sem hafa ekki áður sótt smáforritið „Tímarit hjúkrunarfræðinga“ fyrir Android-tæki geta gert það með símanum sínum eða spjaldtölvunni. Þeir sem nota iPad eða iPhone þurfa hins vegar að bíða enn um sinn en smáforrit fyrir stýrikerfið iOS er í samþykktarferli hjá Apple.
Á vefnum eru eins og áður tvær útgáfur. Annars vegar er það hefðbundna útfærslan þar sem hægt er að sækja hverja grein fyrir sig og hins vegar má fletta blaðinu í heild sinni í Issuu-útgáfu.