|
Fagdeild þvagfærahjúkrunarfræðinga valdi nýverið sinn fyrsta heiðurfélaga: Margréti O. Magnúsdóttur.
Margrét útskrifaðist frá Hjúkrunarskóla Íslands í september 1971 og sem skurðhjúkrunarfræðingur 1976 frá Landspítalanum.
Hún vann á Fjórðungssjúkrahúsinu á Akureyri frá 1976 til 1980 en kom þá aftur á Landspítala og hefur starfað á skurðgangi 12 CD fyrir utan þau tæp fjögur ár sem hún sinnti stöðu deildarstjóra á Dauðhreinsunardeild eða frá 2007 – 2011.
Margrét var teymisleiðtogi í þvagfærateymi í 11 ár, eða fram til 2003, tók þátt í sameiningu þvagfæraskurðlækninga þegar Borgarspítalinn og Landspítalinn runnu saman og skipulagði þvagfærateymið í þeirri mynd sem það er í dag.
|
Hún vann náið með þvagfæraskurðlæknunum að því að velja og kaupa áhöld og tæki fyrir þvagfæradeildina og má þar nefna sérhæft röntgenborð sem dæmi. Hún tók einnig virkan þátt í innleiðingarferli nýrnaígræðslanna. Hún hefur víðtæka reynslu í flestum sérgreinum skurðhjúkrunar og hefur mikla færni þeim í aðgerðum sem framkvæmdar eru á deildinni.
