Unnur Þormóðsdóttir, hjúkrunarstjóri á Heilbrigðisstofnun Suðurlands, hefur alltaf haft áhuga á að vinna með fólki og segir að einhvern veginn hafi aldrei neitt annað staðið til en að starfa innan heilbrigðisgeirans. Að sögn Unnar var þetta bara ákvörðun sem hún tók þegar hún var lítil stúlka og sem betur fer breyttist sú ákvörðun aldrei. „Ég var 15 ára þegar amma mín sem ég hafði alist upp hjá, stærsta hluta ævi minnar, greindist með krabbamein og gekk ég í gegnum það allt með henni, þar til að hún lést 5 árum síðar“, segir Unnur og bætir við: „þannig hafði ég reynslu af því að vera mikið inni á sjúkrahúsi sem aðstandandi og einnig að sinna ömmu heima“.
Hjúkrun er fallegt og göfugt starf
„Hjúkrun er bara eitt fallegasta og göfugasta starf sem hægt er að sinna“ segir Unnur og telur það vera forréttindi að fá að aðstoða og hjálpa fólki þegar það þarf sem mest á því að halda. Unnur heldur áfram og segir „ég gæti aldrei hugsað mér að vinna annað starf. Starfið er gríðarlega fjölbreytt, námið er alþjóðlegt þannig að það er mikill kostur ef manni langar að prófa að búa og starfa í öðru landi,“en sjálf hefur hún búið og starfað í Noregi.
„Hjúkrunarnámið á Íslandi er mjög gott“
Unnur telur að ekki sé hægt að fá leið á hjúkrunarstarfinu því það sé svo óendanlega margbreytilegt og nýtist í svo margt. „Hjúkrunarnámið á Íslandi er mjög gott og við erum að útskrifa framúrskarandi hjúkrunarfræðinga“ bætir Unnur við.
Mikill áhugi á frekari menntun hjúkrunarfræðinga
Unnur hefur haft mikinn áhuga á framþróun hjúkrunar og unnið vel að því að Heilsugæslustöðin á Selfossi fylgist með og innleiði nýjungar sem geta aukið gæði þjónustunnar. „Ég hef einnig mikinn áhuga á að ýta undir frekari menntun hjúkrunarfræðinga til að efla starfið og auka starfsánægju“ segir hún. Sjálf hefur hún verið dugleg við að afla sér menntunar. Unnur lauk B.Sc. í hjúkrunarfræði árið 1997, diplómanámi í stjórnun og rekstri í heilbrigðisþjónustu árið 2003 og diplómanámi á meistarastigi í heilsugæsluhjúkrun árið 2007, öllu frá Háskóla Íslands. Ennfremur lauk hún árið 2014 meistaraprófi í heilbrigðisvísindum með áherslu á stjórnun frá Háskólanum á Akureyri.
Unnur hefur starfað hvað lengst á Heilbrigðisstofnun Suðurlands og síðustu 14 ár sem hjúkrunarstjóri. Jafnframt hefur hún starfað í Noregi, Heilsustofnun NLFÍ í Hveragerði, heimahjúkrun í Reykjavík og á slysadeildinni á Borgarspítalanum.
En þó hjúkrunin virðist vera plássfrek í lífi Unnar á hún önnur áhugamál og nefnir þá sérstaklega börnin sín þrjú og barnabarn, garðrækt og samveru með góðum vinum. Einnig hefur hún haft áhuga á félagsstarfi ýmis konar og hefur t.d. sinnt ötullega til fjölda ára ýmsum trúnaðar- og nefndarstörfum fyrir Félag íslenskra hjúkrunarfræðinga.