Herra Guðni Th. Jóhannesson forseti Íslands sæmdi fjórtán manns heiðursmerki hinnar íslensku fálkaorðu við hátíðlega athöfn á Bessastöðum í dag, 17. júní, eins og hefð er fyrir. Listann má lesa á vef skrifstofu forsetans.
Meðal þeirra sem hlutu fálkaorðuna var Ragnheiður Ósk Erlendsdóttir, hjúkrunarfræðingur, sem hlaut riddarakross fyrir störf í þágu heilbrigðisþjónustu og baráttu við Covid-19.
Ragnheiði Ósk þarf vart að kynna fyrir hjúkrunarfræðingum en hún var einn aðalfyrirlesara á ráðstefnunni Hjúkrun 2022 í vor og gengdi lykilhlutverki við bólusetningar gegn Covid-19. Síðustu áramót var hún valin maður ársins af fréttastofu Stöðvar 2, Vísis og Bylgjunnar. Við það tilefni sagði hún: „Ég held ég verði að fá að tileinka þetta öllu því fjölmarga starfsfólki sem hefur komið með okkur í þetta verkefni. Það eru svo margir á bak við tjöldin sem eiga svo mikið skilið. Þetta er til þeirra.“
Smelltu hér til að lesa viðtal við Ragnheiði Ósk úr síðasta Tímariti hjúkrunarfræðinga.